Doktorsnemi í íslenskri málfræði Fullt starf

Doktorsnemi í íslenskri málfræði

Háskóli Íslands auglýsir starf doktorsnema við nýtt og spennandi verkefni á Hugvísindasviði. Um er að ræða fullt starf í þrjú ár við verkefnið Svæðisbundinn framburður, viðhorf og málbreytingar í rauntíma sem er styrkt af Rannsóknasjóði. Óskað er eftir umsóknum frá hæfum umsækjendum með meistarapróf í íslenskri málfræði eða almennum málvísindum. Doktorsnámið felur í sér rannsókn á svæðisbundnum framburði í íslensku, viðhorfum og þróun í máli einstaklinga. Doktorsneminn verður að hefja störf í síðasta lagi 1. september 2023.

Helstu verkefni og ábyrgð

Markmið rannsóknarverkefnisins er að kanna hvernig einstaklingar breyta framburði sínum á lífstíð sinni og hvaða áhrif meðvituð og ómeðvituð viðhorf til máls hafa á slíkar málbreytingar. Verkefninu er ætlað að kortleggja núverandi stöðu svæðisbundinna mállýskna á Íslandi á þann hátt að niðurstöðurnar verði samanburðarhæfar við niðurstöður fyrri yfirlitsrannsókna af sama toga. Doktorsrannsókninni er ætlað að bæta við fyrri þekkingu á eðli málbreytinga í tungumálum almennt og á að fela í sér markvert framlag á sviði hljóðkerfisfræði og félagslegra málvísinda. Doktorsneminn skal vera skráður í fullt nám við Háskóla Íslands á styrktímabilinu. Leiðbeinendur eru dr. Ásgrímur Angantýsson, prófessor í íslensku nútímamáli og dr. Finnur Friðriksson dósent í íslensku við Háskólann á Akureyri.
 

Hæfniskröfur

• Meistaragráða í íslenskri málfræði eða almennum málvísindum.
• Traustur bakgrunnur í hljóðfræði, hljóðkerfisfræði og félagslegum málvísindum.
• Góð kunnátta í íslensku og ensku.
• Sjálfstæð vinnubrögð og færni til að vinna í teymi.

Frekari upplýsingar um starfið

Laun samkvæmt gildandi kjarasamningi sem fjármála- og efnahagsráðherra og Félag háskólakennara hafa gert.

Doktorsneminn innritast í doktorsnám í íslenskri málfræði við Háskóla Íslands. Umsækjandinn sem verður fyrir valinu sækir í samráði við leiðbeinendur um inntöku í doktorsnám við Háskóla Íslands áður en formleg ákvörðun um ráðningu er tekin. Tekið er við umsóknum í doktorsnámið utan hefðbundins umsóknartímabils doktorsnáms og umsækjandanum verður leiðbeint í gegnum ferlið. 

Með umsókn skulu fylgja:

• Feril- og ritaskrá.
• Lýsing upp á um 2000 orð sem sýnir fram á áhuga á rannsóknaverkefninu og hvernig umsækjandi ætlar að nálgast viðfangsefnið.
• Námsferilsyfirlit og staðfestingar á prófgráðum (BA og MA). Hafi námið ekki verið stundað við Háskóla Íslands þarf umsækjandi að leggja fram staðfest afrit af prófskírteinum.
• Nöfn tveggja meðmælenda með upplýsingum um hvernig er hægt að ná í þá.

Öllum umsóknum verður svarað og allir umsækjendur verða látnir vita þegar ákvörðun liggur fyrir. Umsóknir geta gilt í allt að þrjá mánuði frá lokum umsóknarfrests. 

Laun verða samkvæmt kjarasamningi Félags háskólakennara (fh.hi.is) og Fjármálaráðuneytis. 

Við ráðningu í störf í Háskóla Íslands er tekið mið af jafnréttisáætlun skólans, sjá hér: http://www.hi.is/haskolinn/jafnrettisaaetlun#markmid2. 

Vakin er athygli á málstefnu Háskóla Íslands, sjá hér: https://www.hi.is/haskolinn/malstefna_haskola_islands.

Starfshlutfall er 100%

Umsóknarfrestur er til og með 31.03.2023

Nánari upplýsingar veitir

Ásgrímur Angantýsson
–
[email protected]
–
525 5372
Finnur Friðriksson
–
[email protected]
–
460 8575

Smelltu hér til að sækja um starfið